Բալաթ․ ապրել միասին գիրքը ուսումնասիրում է Ստամբուլի բազմերանգ թաղամասերից մեկի հիշողությունը, որը նշանակալի է իր մշակութային և պատմական ժառանգությամբ:
Տարբեր գիտակարգերից մի շարք հեղինակներ՝ մարդաբաններ, նշանաբաններ, պատմաբաններ, ճարտարապետներ, համատեղ ջանքերով բացահայտել և վերարժևորել են թաղամասի սոցիալական և քաղաքային հիշողությունը, վերլուծել Բալաթի ներկայիս կյանքը, համեմատել տարբեր ժամանակաշրջաններ՝ սկսած բյուզանդական դարաշրջանից մինչև 20-րդ դարի ողբերգական իրադարձությունները։
Գրքի հիմնական նպատակներից էր բազմամշակութային Բալաթի հիշողության ու հետհիշողության պատկերումը, ինչպես նաև միջգիտակարգային վերլուծության միջոցով տարբեր էթնիկական և կրոնական խմբերի համակեցության ձևերի փոխակերպումներն արձանագրելը։
Միասին ապրելու փորձը, խաղաղ համակեցությունը, փոքր ու մեծ աղետների ու հակամարտությունների հետքերը խարսխված են հայերի, հույների, բուլղարների, հրեաների, թուրքերի և այլոց հիշողություններում: Գիրքը բազմաշերտ է Բալաթի հիշողության պես՝ հյուսված տարբեր լեզուներից ու մեթոդներից։ Այստեղ միահյուսված են ակադեմիական տեքստերն ու գեղարվեստական արձակը, վիճակագրությունները, փաստերը ու ինքնակենսագրական պատմությունները։
Բացի դրանից, գրքի խմբագիրներն այստեղ կարևորել են Բալաթի և տեղանքի ճարտարապետական հիշողության դրվագների պատկերային ներկայացումը. այն լի է արխիվային վավերագրական լուսանկարներով և նշանավոր լուսանկարիչների գործերով, նկարազարդումներով և քարտեզներով։
ՀՏԴ 93/94:316:008
ԳՄԴ 63.3(5Հ)+60.5+71
Բ 200
Բալաթ․ ապրել միասին․ Խմբային մենագրություն, խմբ․՝ Ամիրյան Տ․, Քալանթարյան Ս․, Կըյգը Գ․, CSN Lab, Երևան, 2023, 376 էջ։