Ապրիլի 22-ին, «Մշակութային եւ սոցիալական նարատիվների լաբորատորի»-ն ներկայացրեց «ZINEադադար»-ի առաջին եւ երկրորդ հրատարակությունները։ Միջոցառմանն անձամբ ներկա էր ՀՀ-ում Կանադայի արտակարդ եւ լիազոր դեսպան Էլիսոն Մերի Լը Քլերը։ Իր ելույթում տիկին Լը Քլերն ընդգծեց պատերազմների եւ հակամարտությունների ժամանակ կանանց եւ աղջիկների փորձառության տեսանելիության բարձրացման եւ հակամարտության հանգուցալուծմանն ու խաղաղաշինությանը միտված գործընթացներում կանանց ակտիվ ներգրավվածության կարեւորության մասին։
Հանդիպումն ուղեկցվեց պանելային քննարկմամբ, որին ներկա էին «ZINEադադար»-ի առաջին եւ երկրորդ հանդեսների պատրաստման աշխատանքներում ներգրավված հեղինակները, փորձագետները և վիզուալ արվեստագետները։ Միջոցառման մոդերատորը «ZINEադադար» նախագծի համակարգող եւ համանուն փոդքսթների հաղորդավար Շուշաննա Թեւանյանն էր։
Շնորհանդեսի ներկաներն ակտիվորեն մասնակցեցին բուն միջոցառմանը հաջորդող քննարկմանը։ Ոմանք վերահաստատեցին, որ գերիշխող խոսույթներում եւ նարատիվներում կանայք ներկայացվում են որպես «զոհեր», որոնց իրավունքները ոտնահարվում են պատերազմների եւ հակամարտությունների ժամանակ. կանայք կրում են զինված հակամարտությունների այնպիսի հետեւանքներ, ինչպիսիք են սեռական բռնությունը, ընտանեկան բռնությունը եւ այլն։ Մյուսներն անդրադարձան բանակցային եւ խաղաղաշինական գործընթացներում կանանց ներգրավվածության կարեւորությանը։
«Մշակութային եւ սոցիալական նարատիվների լաբորատորիա»-ն շարունակում է ակտիվորեն աշխատել «ZINEադադար» նախագծի վրա։ Առաջիկայում լույս կտեսնեն նոր զիներ եւ փոդքասթի էպիզոդներ։
Նախագիծն իրականացվում է «Մշակութային և սոցիալական նարատիվների լաբորատորիա»-ի կողմից՝ կանադական «Աջակցություն տեղական ծրագրերին» ֆոնդի աջակցությամբ։