«Բալաթ. ապրել միասին» նախագիծը նպատակ ունի ուսումնասիրելու և վերհանելու Ստամբուլի պատմական թաղամասերից մեկի՝ Բալաթի բազմաշերտ հիշողությունը:
Ի թիվս այլ արժեքների` թաղամասը կարևոր է թե՛ որպես բազմամշակութային անցյայի կրող, և թե՛ որպես տարբեր էթնիկ ու սոցիալական խմբերի համատեղ խաղաղ կյանքի կենդանի վկա. այստեղ հարյուրավոր տարիներ կողք կողքի ապրել են հայեր, հույներ, հրեաներ և թուրքեր։
Այսօր Բալաթը, բազմաթիվ մեծ քաղաքների պատմական թաղամասերի ճակատագրին արժանանալով, կանգնած է ջենտրիֆիկացման վտանգի առջև։ Այս թաղամասի երբեմնի բազմամշակութային անցյալի վկաներն են տեղի ճարտարապետությունը և տեղացիների շարունակաբար խամրող հիշողությունները: Իրարից ընդամենը մի քանի մետր հեռավորության վրա այստեղ տեղակայված են բազմաթիվ մզկիթներ, հայկական Սուրբ հրեշտակապետ եկեղեցին, հունական ուղղափառ պատրիարքարանը, հունական այլ եկեղեցիներ, բուլղարական ուղղափառ եկեղեցին, Թուրքիայի ամենահին սինագոգներից Օհրիդը և այլն։
Բալաթի հիշողության մասին գիրքը և վեբ հարթակը կյանքի են կոչվել տարբեր գիտակարգերից մասնագետների ջանքերի շնորհիվ: Թաղամասի բազմերանգ պատկերը վերականգնելու համար այստեղ մեկտեղվում են բանավոր պատմություններ, գիտական հոդվածներ, հարցազրույցներ, արխիվային նյութեր, տեսանյութեր և լուսանկարներ: